Hrekkjavökukakan

    

október 28, 2020

Er ekki tilvalið að gera sér dagamun og skella í eina hrekkjavökuköku

Hráefni

Botnar

280 g hveiti

390 g sykur

70 g Cadbury bökunarkakó

2 tsk. lyftiduft

1 tsk. matarsódi

1 tsk. salt

3 msk. sterkt uppáhellt kaffi

225 ml súrmjólk/ab mjólk

110 ml matarolía

3 egg

2 tsk. vanilludropar

225 ml sjóðandi vatn

Súkkulaðikrem

125 g smjör við stofuhita

500 g flórsykur

50 g Cadbury bökunarkakó

3 msk. síróp

2 tsk. vanilludropar

80 ml rjómi

Svartur matarlitur

Vanillukrem

125 g smjör við stofuhita

500 g flórsykur

2 tsk. vanillusykur

190 ml rjómi

Skreyting

Um 2 pakkar af Halloween Oreo kexkökum

Svart og appelsínugult kökuskraut

Sykur-augu (fást til dæmis í Allt í köku og Hagkaup)

Leiðbeiningar

Botnar

1Hitið ofninn í 185°C.

2Sigtið næst öll þurrefnin í skál og blandið saman.

3Næst má setja kaffi, súrmjólk, matarolíu, egg og vanilludropa í skál og hræra síðan saman við þurrefnin.

4Að lokum má hella sjóðandi vatninu varlega saman við blönduna, hræra rólega og skafa vel niður á milli þar til slétt og fallegt deig hefur myndast (athugið að deigið er þunnt).

5Klippið bökunarpappír í botninn á 3 x 15 cm bökunarformum og spreyið síðan vel með PAM matarolíuspreyi.

6Skiptið deiginu jafnt á milli botnanna (gott að vigta deigið) og bakið í um 25 mínútur eða þar til prjónn kemur hreinn út.

Súkkulaðikrem

1Þeytið smjörið þar til létt og ljóst.

2Bætið til skiptis blautum og þurrum hráefnum við smjörið, þeytið og skafið niður á milli þar til fallegt súkkulaðikrem hefur myndast.

3Bætið um 1-2 tsk. af svörtum matarlit í kremið á þessu stigið og blandið þar til jafn litur hefur myndast.

Vanillukrem

1Þeytið smjörið þar til létt og ljóst.

2Bætið til skiptis blautum og þurrum hráefnum við smjörið, þeytið og skafið niður á milli þar til fallegt vanillukrem hefur myndast.

Samsetning

1Setjið svarta súkkulaðikremið í einn sprautupoka og vanillukremið í annan, gott er að hafa stóran stjörnustút á báðum pokum (t.d 1 M frá Wilton). Athugið að þá má líka setja bara hluta í pokana og hafa hluta áfram í skál ef þið viljið fremur setja kremið þannig á.

2Setjið fyrsta botninn á kökudisk, sprautið hring yst við kantinn með vanillukreminu og fyllið upp í að innan með súkkulaðikremi (þetta gert til þess að svarta kremið komi ekki í gegn þegar þið setjið það hvíta utan á kökuna), endurtakið með næsta botn og setjið loks þann þriðja efst.

3Sprautið svörtu kremi upp rúmlega hálfa kökuna og næst hvítu, setjið einnig hvítt krem ofan á kökuna.

4Dreifið úr með spaða og það er allt í lagi þó kremið blandist aðeins um kökuna miðja. Gott er að bleyta spaðann aðeins því þá er auðveldara að draga kremið til.

5Setjið svart og appelsínugult kökuskraut í skál, setjið reglulega skraut í lófann og leggið upp við neðsta hluta kökunnar. Gott er að hafa skál undir til að skrautið sem ekki festist við kökuna fari ekki út um allt.

6Festið næst augu og Halloween Oreokex hér og þar á hliðarnar. Gott er að sprauta smá auka kremi á kexkökuna áður en hún er fest en óþarfi er að gera það við augun.

7Að lokum má skreyta toppinn á kökunni með því að sprauta súkkulaðikreminu í toppa og setja eitt Halloween Oreokex alltaf á milli, strá síðan kökuskrauti yfir allt saman.

Uppskrift frá Berglindi á gotteri.is

00:00

Aðrar spennandi uppskriftir

Milka Brownies

Einföld og bragðgóð Milka súkkulaði brownie kaka.

Karamellumarengs

Það er fátt betra en púðursykurmarengs að mínu mati! Hvað þá þegar búið er að toppa slíka tertu með ljúffengri karamellu í allar áttir, namm þessi er sko B O B A eins og Bubbi myndi segja það!

Gómsæt Dumle mús

Hér kemur ofur einfaldur og mjög ljúffengur eftirréttur. Músin hefur aðeins fjögur innihaldsefni og tekur litla stund að útbúa.