Útileguskúffa uppskrift • Gerum daginn girnilegan

Útileguskúffa

  

maí 27, 2021

Það jafnast ekkert á við nýbakaða skúffuköku og ískalda mjólk! Nú eru útilegur og ferðalög að fara í gang að nýju og það er sannarlega hægt að slá í gegn með því að taka eina skúffuköku með í ferðalagið.

Hráefni

SKúffukaka

460 g hveiti

60 g Cadbury bökunarkakó

290 g sykur

220 g púðursykur

1 ½ tsk. lyftiduft

½ tsk. salt

120 g sýrður rjómi

250 g AB mjólk

3 egg

180 ml matarolía

3 tsk. vanilludropar

330 ml heitt, sterkt kaffi

Krem

300 g smjör við stofuhita

60 g Cadbury bökunarkakó

½ tsk. salt

400 g flórsykur

130 g heit súkkulaðisósa (keypt tilbúin á flösku)

Leiðbeiningar

Skúffukaka

1Hitið ofninn í 170°C, klæðið skúffukökuform með bökunarpappír að innan og spreyjið vel með matarolíuspreyji (eða spreyjið bara beint í formið).

2Sigtið hveiti og bökunarkakó í hrærivélarskálina og bætið næst öðrum þurrefnum saman við hveitiblönduna.

3Pískið allt „blautt“ saman í aðra skál og blandið síðan varlega saman við þurrefnin á lágum hraða í hrærivélinni.

4Skafið niður á milli og hrærið þar til slétt og þunnt deig hefur myndast.

5Bakið í um 30-35 mínútur eða þar til prjónn kemur hreinn út.

Krem

1Þeytið smjörið þar til létt og ljóst.

2Bætið kakóinu og saltinu saman við og þeytið áfram, skafið niður á milli.

3Bætið næst flórsykri og súkkulaðisósu saman við í nokkrum skömmtum og skafið niður á milli (ekki er þörf á því að hita sósuna, bara vigta hana beint úr flöskunni).

4Þeytið kremið þar til létt og ljóst og smyrjið því næst yfir kökuna.

Uppskrift frá Berglindi á gotteri.is

00:00