Það getur verið svo ljúft að baka eitthvað sem er ofureinfalt en á sama tíma ljúffengt og fallegt. Þessi uppskrift tikkar í öll þau box. Ofureinföld þar sem við kaupum tilbúið smjördeig og púslum svo bara hráefnunum saman.
Fullkomið í bröns eða sem eftirréttur sérstaklega á Valentínusardaginn eða Bónda og Konudaginn.
Stillið ofn á 200°c. Skerið út hjörtu með piparkökuformi eða með hníf, þá er gott að teikna hjarta á bökunarpappír, klippa það út og leggja á smjördeigið og skera með fram pappírnum.
Skerið svo grunnt með hníf u.þ.b cm inn í hjartað annað hjarta, ekki fara í gegnum deigið heldur aðeins hálfa leið. Setjið hjörtun á bökunarpappírsklædda ofnplötu og bakið í 10-12 mín.
Þegar hjörtun eru orðin ljósbrún takið plötuna út og ýtið miðjunni varlega niður, þannig gerum við pláss fyrir súkkulaðismjörið.
Við setjum eina teskeið af súkkulaðismjöri í hvert hjarta, gott er að setja smá í skál og hita örlítið í örbylgjuofni og hella ofan í hjörtun, leyfið svo hjörtunum að kólna.
Sáldrið flórsykri yfir hjörtun með sigti og skerið jarðaberin. Skerið litlar rákir í átt að toppinum án þess að fara alla leið í gegn, dragið berið í sundur og leggið á hjartað. Skreytið með súkkulaðismjöri yfir.
Gott er að bera hjörtun fram með ís eða jafnvel rjóma, eða bara borða þau ein og sér.