Við byrjum á því að gera botninn. Setjið öll innihaldsefni fyrir utan kókosolíu í blandara og vinnið smátt þar til þetta verður að mylsnu. Bætið kókosolíunni út í, ef blandan er þurr má bæta aðeins meiru við. Setjið bökunarpappír í botninn á 20cm smelluformi. Setjið um það bil helminginn af mylsnunni í formið og þjappið. Þetta er frekar stór uppskrift en mér finnst gott að gera meira en minna. Það er hægt að frysta blönduna eða gera aukabotn ef vill.

Hitið ofninn í 175°C og bakið botninn í 20 mín. Takið út eftir þann tíma og leyfið botninum að kólna. Á meðan gerið þið fyllinguna.

Setjið öll innihaldsefni í blandara. Það er mjög mikilvægt að kasjúhneturnar hafi fengið að liggja í bleyti yfir nótt. Ég hef ekki fundið almennilega leið til að flýta fyrir því ferli en það er alveg þess virði.

Vinnið fyllinguna í blandaranum eins lengi og þarf þar til hún verður silkimjúk. Það eiga ekki að finnast neinir bitar í fyllingunni.

Hellið fyllingunni yfir kaldan botninn og setjið í frysti. Frystið í allavega 1 klst. Gerið karamelluna á meðan kakan er í frysti og leyfið henni að ná stofuhita. Hún er í þynnri kantinum þegar hún er heit en hafið ekki áhyggjur, hún þykknar mikið eftir því sem hún kólnar.

Þegar karamellan er klár smyrjum við henni eftir smekk yfir fyllinguna. Við útbúum súkkulaði ganache og setjum það eftir smekk yfir karamelluna og stráum salthnetum yfir. Uppskriftirnar af karamellunni og ganache kreminu eru frekar stórar en þær geymast vel í kæli og vel hægt að nota síðar.

Bræðið sykurinn í þykkbotna potti. Þegar hann er allur bráðinn og farinn að gyllast vel setjið þá smjörið saman við og hrærið rösklega þar til það er samlagað sykrinum að mestu. Hellið Oatly rjómanum út í og hrærið rösklega þar til allt er samlagað. Setjið saltið út í að síðustu.

Saxið súkkulaðið smátt og hitið hafrarjómann að suðu og hellið yfir súkkulaðið. Látið bíða í smástund og hrærið saman. Látið kólna vel áður en sett yfir kökuna.